விஜய் டிவியில் மருத்துவர் பற்றிய கருத்து பற்றி ஜெயமோகன் பதிவு- சில கேள்விகள்


download

விஜய் டிவியில் மருத்துவர் பற்றிய கருத்து பற்றி ஜெயமோகன் பதிவு- சில கேள்விகள்

விஜய் டிவியில் மருத்துவர் பற்றி “நீயா நானா” நிகழ்ச்சியில் வெளிப்படுத்தப்பட்ட கருத்துகள் தொடர்பாக ஜெயமோகனின் பதிவின் ஒரு பகுதி கீழே:

“டாக்டர் தொழில் முழுமையாகவே நுகர்வோர் பாதுகாப்புச் சட்டத்தின் எல்லைக்குள் வந்தாகவேண்டும் என்பதும், டாக்டர்களின் பிழைகள் தேவை என்றால் பொதுவான சமூகசேவகர்கள் மற்றும் சர்வதேச அளவிலான மருத்துவர்கள் கொண்ட குழுக்களால் பரிசீலிக்கப்படவேண்டும் என்பதும் இன்றைய முக்கியமான கோரிக்கைகளாக அமையவேண்டும். இந்திய மருத்துவம் மிகக்கடுமையான சட்டக்கண்காணிப்புக்கு உட்பட்டாகவேண்டிய சூழல் இன்றுள்ளது.

டாக்டர்களை எவ்வகையிலும் சிறப்பாக மதிக்கவேண்டியதில்லை, சேவையளிப்பவர்களாக மட்டும் அணுகுவோம். உலகம் முழுக்க டாக்டர்களை இன்று அப்படித்தான் அணுகுகிறார்கள். அந்த அணுகுமுறையே இன்றைய சூழலில் நமக்குப் பாதுகாப்பானது, லாபகரமானது. ஒருபோதும் ஒரு கட்டிடப்பொறியாளரை முழுமையாக நம்பி நம் பணத்தையும் பொருளையும் ஒப்படைப்பதில்லை. ஒருபோதும் டாக்டர்களையும் நம்பக்கூடாது. நம் உடலையும் உயிரையும் கொண்டு அதிகபட்ச லாபத்தை அடைய முயலும் ஒரு சேவை வணிகர் அவர் என்பதை எப்போதும் நினைவில் கொள்ளவேண்டும்.”

முதலில் ஜெயமோகன் கருத்தை நாம் வரவேற்க வேண்டும் என்பதைக் கூறி அவர் முன் வைக்கும் இரண்டு விஷயங்களில் சிறு விரிவு அல்லது மறுபக்கமான சில கேள்விகள் இருகின்றன. அவற்றைக் காண்போம்.

“சட்டக் கண்காணிப்பு” என்று ஒன்றைப் பரிந்துரைக்கிறார். இது சற்றே மேலெழுந்தவாரியானது. சட்டக் கண்காணிப்பு கிட்டத்தட்ட எதற்குமே இல்லை. நிதி நிறுவனம் ஆரம்பிக்கலாம். சுருட்டும் வரை என்ன கண்காணிப்பு இருக்கிறது? சுருட்டிய பிறகு புகார் தந்தால் சட்டம் பாயும். கட்டிடங்களை இனிமேல் வருடா வருடம் தணிக்கை செய்வார்கள் அல்லது கட்டிட வரைவுகளை சரிபார்ப்பார்கள் என்று நம்பலாம். உணவுக் கலப்படத்தில் என்ன கண்காணிப்பு இருக்கிறது? எத்தனை வழக்குகள் பதிவு செய்யப் படுகின்றன?

கட்டாயத் தணிக்கை என்பது மிகவும் அவசியமாகி விட்டது. இது விற்கப் படும் பொருட்கள் விஷயத்தில் தரத் தணிக்கையாகவும், சேவையில் தரம் மற்றும் நேர்மை பற்றிய தணிக்கையாகவும் அமைய வேண்டும்.

மருத்துவர்களை அவர்கள் துறை சார்ந்த நிபுணர்கள் குழுவே ஆண்டு முழுவதும் படிப்படியாக எல்லா மருத்துவமனைகள் மற்றும் மருத்துவ சேவை தரும் தனி நபர்களைத் தணிக்கை செய்யும் முறை வர வேண்டும்.

கணக்காயர்களை (Auditors). எடுத்துக் கொள்வோம். அவர்கள் ஒப்பம் இடப்பட்ட கணக்கு அறிக்கையில் ஏமாற்று இருந்தால் அவர்களே முதலில் தண்டிக்கப் படுவார்கள். அவர்களது அமைப்பான Chartered Accountants Instituteன் சட்ட திட்டங்கள் மிகக் கடுமையானவை. சத்யம் கம்ப்யூட்டர்ஸ் கணக்கு வழக்கைத் தணிக்கை செய்த நிறுவனம் மீது நடவடிக்கை எடுக்கப் பட்டது.

மருத்துவர்கள் சேவை, மருத்துவமனைகளின் சேவை இவை இரண்டுமே தணிக்கைக்கு / கட்டாயத் தணிக்கைக்கு ஆட்படுத்தப் பட வேண்டும். சட்ட ரீதியான கண்காணிப்பு எதன் மீதும் இல்லை. எல்லாப் பொருட்களின் தரம், அனைத்து சேவைகளின் தரம் மற்றும் நேர்மை கட்ட்டாயத் தணிக்கைக்கு உள்ளாக வேண்டும். வழக்கறிஞர் சேவை, ஆசிரியர் மற்றும் கல்வி நிறுவனங்கள் உட்பட எல்லாத் துறையினரும் கட்டாயத் தணிக்கைக்கு ஆட்பட வேண்டும். கண்காணிப்பு ஊழலின் புதிய வாசலைத் திறக்கவே வாய்ப்பு உண்டு.

அடுத்தது மருத்துவர்கள் மற்றும் ஆசிரியர்களை நாம் ஒரு பீடத்தில் வைக்கத் தேவையில்லை என் கிறார். எழுத்தாளர்களே பீடங்கள் கிடைத்தால் சிக்கெனப் பிடித்துக் கொள்ளும் போது மருத்துவரும் ஆசிரியரும் சும்மா விடுவார்களா?

பீடத்தை அந்த துறையின் சாதனையாளர்கள் ஜாம்பவான்கள் மறுதலிக்க வேண்டும்.

ஆனால் ஒளிவட்டத்தை, வணக்கத்துக்குரிய பீடத்தை மருத்துவர் ஆசிரிய எழுத்தாளர் இவர்களில் எத்தனை பேர் மறுதலித்தார்கள்?

ஆத்ம பரிசோதனைக்கான விஷயம் இது. சாமானிய ஆள் தான் மதிக்கும் (ஆதாரத்தோடோ அல்லது உணர்ச்சி வசப்பட்டோ) யார் காலிலும் விழத் தயார். நீ யார் காலிலும் விழாதே என்று கும்பிடப் படும் எந்த ஆளும் சொல்வதில்லை. என்ன முரண்!

(image courtesy: wiki)

Posted in நாட் குறிப்பு | Tagged , , | Leave a comment

சென்னை – 375 வயது விடலை


egmpre

சென்னை – 375 வயது விடலை

கடந்த சில நாட்களாகவே சென்னை 375 என்று பல கட்டுரைகள் மற்றும் புகைப்படங்களை நாம் ஊடகங்களில் காண்கிறோம்.

34 வருடங்களுக்கு முன் நான் சென்னைக்கு வேலை கிடைத்ததால் வந்து இங்கேயே இருக்கும் படி ஆகி விட்டது. தமிழ் நாட்டில் பல நகரங்கள் மற்றும் வெளி மாநிலங்களுக்கு இடமாற்றம் ஆகிப் போனாலும் என் குழந்தைகள்- குடும்பம் இங்கேயே இருந்து விட்டார்கள். அதனால் எனது நிரந்தர இருப்பிடமாகச் சென்னை ஆகி விட்டது.

சென்னை பற்றிய என் முதல் கண்ணோட்டம் இங்கே மனம் விட்டுப் பேச யாரும் இல்லை என்பதாக இருந்தது. நன்றாக உடை உடுத்துவது கட்டாயம் என்பது சென்னையில் தான் பிடி பட்டது.

சென்னையில் தொடக்க காலத்தில் “தனி ஆண்களின் சொர்க்கம்” (Bachelor’s paradise) என்று அழைக்கப் படும் திருவல்லிக்கேணியில் தான் நான் தங்கி இருந்தேன். பின்னர் அமைந்தகரைக்கும் நுங்கம்பாக்கம் ரயில் நிலையத்துக்கும் இடைப்பட்ட ஒரு இடத்தில் என் சகோதரர்களுடன் தங்கி இருந்தேன். திருமணமான பின் மந்தைவெளி பின்னர் பெசண்ட் நகர் பின்னர் நிரந்தரமாகத் திருவான்மியூர் என்று என் இருப்பிடம் அமைந்தது.

தொடக்க காலத்தில் திருச்சிக்கு இடமாற்றம் கேட்டு விண்ணப்பித்தேன். கிடைக்கவில்லை. பின்னர் இங்கேயே தங்கி விட்டேன்.

நான் மேற்குறிப்பிட்ட காலங்களில் சென்னையில் இந்த அளவு வாகன இரைச்சலும் போக்குவரத்து நெரிசலும் இல்லை. சைக்கிளில் பல வருடங்கள் அலுவலகம் சென்று வந்து கொண்டிருந்தேன்.

அது ஏன் சென்னையை விடலை என்று குறிப்பிடுகிறேன்? நான் பார்த்த அளவில் 34 வருடங்களில் இன்னும் பாதாள சாக்கடைப் பணிகளோ அல்லது போக்குவரத்து ஒழுங்கோ திட்டவட்டமாக முடியவே இல்லை. தோண்டிக் கொண்டே இருக்கிறார்கள். சென்னை என்று கருதப்படும் முக்கிய நகர்ப்பகுதியில் அண்ணா நகர், கேகே நகர், பெசண்ட் நகர், அடையாரின் சில பகுதிகள் தவிர வேறு எங்கும் திட்டமிட்ட நகர அமைப்பே கிடையாது. மைலாப்பூர், திருவல்லிக்கேணி, பெரம்பூர், ராயபுரம், சைதாப் பேட்டை, அடையாறு, திருவான்மியூர் என்று உதிரி உதிரியான சிறு நகர்கள் ஒன்றாகிப் போன கலவை.

ஒரு விடலைக்குத் தானே என்ன செய்ய வேண்டும் என்று தெரியாது. பிறரின் எதிர்பார்ப்புகள் ஏகப்பட்டது இருக்கும். தன் போக்கில் தான் அந்தப் பையன் போவான். எப்படியோ வளர்ந்து விடுவான். வளர்ந்த பிறகு அவன் சுமாராக முன்னேறினாலும் ஏகப் பட்ட பாராட்டுதான்.

20 25 வருடம் முன் சென்னை பெரு நகரமே ஒழிய பன்முக நகரல்ல. (only a metro and not cosmopolitan). அப்போதெல்லாம் ஆந்திரம் மற்றும் வடமாநிலத்தில் இருந்து இங்கே பெரிய தொழிலதிபர்களானவர்கள் மட்டுமே மாற்று மொழி பேசுவோர். இப்போது கூலிக்கார்கள் முதல் தகவல் தொழில் நுட்பப் பணியாளர், பிற மாநிலத்திலிருந்து பொறியியல் படிப்புக்காக வரும் மாணவர் வரை, பல மாநிலத்தவர்கள் வாழுகிறார்கள்.

20 வருடம் முன் மும்பைக்கு இடமாற்றம் ஆன போது பல மொழி பேசுவோரை அங்கே காண முடிந்தது. கடந்த பத்தாண்டுகளில் தான் சென்னையும் மும்பையைப் போல பல மாநிலத்தவர் தேடிச் சென்றடையும் இடம் ஆகி இருக்கிறது.

இன்று சென்னையில் பேருந்திலோ அல்லது புறநகர் ரயிலிலோ தமிழ் தவிர்த்த பல மொழிகளும் ஆங்கிலமும் கைபேசியில் அடுத்தவன் காது செவிடாகும் படி அலறிக் கேட்கின்றன.

டெல்லி அளவு இல்லையென்றாலும் நவீன ஆடைகளை இளம் பெண்கள் அணிவது இப்போது ஓரளவு பழகி விட்டது. முன்னர் வேட்டி கட்டிய பல தாத்தாக்கள் டிரவுசருடன் சுற்றுவது சென்னையில் மிக அதிகம். ‘சாட்’ உணவுகள் கடற்கரையிலும் சாலை ஓரங்களிலும் நிறையவே கிடைக்கின்றன. நடைபாதைகள், ரயில் நிலையங்களில் ‘பீடா’ எச்சிலின் கறைகள் கரையில்லாமல் நீண்டு கொண்டே போகின்றன.

ஆடைகள் வாங்குவது ஒரு காலத்தில் பண்டிகைக்கு மட்டும் என்று இருந்தது. பிறந்த நாள் என் குழந்தைப் பருவத்தில் நான் சகோதரர் ஒரு சகோதரி உட்பட நான்கு பேருக்கும் கொண்டாடியதே கிடையாது. கோயிலுக்குக் கூடப் போனதில்லை. இன்று தேவையிருக்கிறதோ இல்லையோ ஆடைகளில் மக்கள் பணத்தை அள்ளி வீசுகிறார்கள். வருடம் ஒரு முறை போடுமளவு நடுத்தர மக்களிடம் ஆடைகள் அதிகம். அதற்கான கடைகளால். தி.நகர் யாருமே போக அஞ்சும் இடமாகி விட்டது.

சென்னை மக்களிடம் எனக்கு மிகவும் பிடித்தது அவர்களின் உடல்மொழியில் இருக்கும் மிடுக்கும் தைரியமானவர் என்னும் நிமிர்வும். பிடிக்காதது கிராமப்புற மக்களை “நாட்டுப்புறம்”, நாட்பொறம் என்று இளப்பமாக நினைப்பது.

சென்னையில் நான் இன்று வரை ஒட்டவில்லை. என்னை சென்னைவாசி என்று குறிப்பிட எனக்கு எந்த விருப்பமான காரணமும் இல்லை. மறுபக்கம் சென்னை எனக்கு நிறையவே செய்திருக்கிறது. என் குழந்தைகளின் பட்டப் படிப்புக்கான தயாரிப்பு இங்கே தான். அவர்கள் கடற்கரையை மிகவும் ரசித்து வளர்ந்ததாலேயே நான் திருவான்மியூரை விட்டு நீங்கவே இல்லை. நான் மிகுந்த மன அழுத்தத்துடனே பல வருடங்களை வீணடித்தேன். ஆனால் சென்னை என்னை அழிய விடவில்லை. என் பட்ட மேற்படிப்பு மேலாண்மைத் துறையில் அண்ணா பல்கலைக்கழகத்தின் தொலை தூரக் கல்வியில் வெற்றிகரமாக முடிய என் சென்னை வாசமே காரணம். என் நூல்களில் விழாவில் வெளியிடப்பட்டது சென்னையில் தான். பிற நூல்களுக்கு விழா இல்லை. சமீபத்தில் ஐந்து நூல்கள் எழுதியும் நான் வெளியிடத் தயங்கி வருகிறேன்.

சென்னை கடற்கரை எனக்கு அதிகப் பிரியம் இல்லாதது. கடல் அலைகள் மன அமைதிக்கு உகந்தவை ஆகா என்பது என் கருத்து. ஹாரிங்க்டன் சாலை ஒரு காலத்தில் மிகவும் அமைதியாக இருக்கும். அங்கே நடந்து திரிந்த காலங்கள் இனியவை. அண்ணா நூற்றாண்டு நூல் நிலையம் உலகத் தரமானது. என்ன செய்வது? நம் அதிர்ஷ்டம் அவ்வளவே. நாம் மிகவும் மதிக்கும் பல அரசியல் தலைவர்கள் மற்றும் எழுத்தாளர்களை நான் சென்னையில் நேரில் பார்த்து மகிழ்ந்திருக்கிறேன்.

அரசுப் பேருந்தில் பயணம், சாதாரண தேனீர்க் கடைகளில் தேனீர் அருந்துவது இவற்றால் நான் ஏழை மக்களின் பிரச்சனைகளை நன்கறிவேன். நூறு ரூபாய் பெரிய தொகையான எவ்வளவோ மக்கள் லட்சக் கணக்கில் சென்னையில் வாழ்கிறார்கள்.

கிராமத்தில் ஏழைக் குடிசை கூட பெருக்கி சாணமிட்டு மெழுகி ரம்மியமாக இருக்கும். இங்கே குப்பங்களில் மிருகங்களைப் போல் அடைந்து வாழும் மக்களிடம் அது கூடாது என்று சொல்லி நிரந்தரமாக அத்தகைய சாக்கடையோரக் குப்பங்களை நீக்கி அவர்களை நல்லபடியாக அரசோ தனியாரோ வாழ வைக்க வேண்டும்.

சென்னையில் தான் பல ஆண்டுகள் ரத்ததானம் செய்தேன். டெல்லியில் மஞ்சட்காமாலை என்னைக் கிட்டத்தட்ட கொன்ற போது ரத்த தானம் செய்யும் தகுதியை நிரந்தரமாக இழந்து விட்டேன்.

சென்னையைப் பற்றி ஒரே ஒரு வார்த்தையில் சொல்ல வேண்டுமென்றால் “கனவு விதைகளின் நஞ்சை பூமி”

(image courtesy:wiki)

Posted in Uncategorized | Tagged , , , , , , , , | Leave a comment

கண்ணாமூச்சி


26127533-a-boy-playing-hide-and-seek-with-his-mother-and-grandmother-in-the-forest
கண்ணாமூச்சி

நம்ப முடியவில்லை
ஏற்கவே முடியவில்லையில்
துவங்கி

நீங்கள்: என்ன குறை
வைத்தீர்கள்
அவன் அவசரப் பட்டு
விட்டானேயில்
தொடர்ந்து

ஆன்மா அழியாது
எங்கேனும் பிறந்து
இருப்பான் இந்நேரம் என்று
முடித்து

சொல்லிக் கொள்ளக் கூடாது
என்று
அந்த வீட்டில் மீண்டும்
வெறுமையின் மௌனம்
விரவ
வெளியே வந்தேன்

மாலை மங்கும்
முன்
உற்சாகமாய் குழந்தைகள்
விளையாடிக் கொண்டிருந்தனர்
கண்ணாமூச்சி

(image courtesy:123rf.com)

Posted in கவிதை | Tagged , , , , | Leave a comment

ரிச்சர்ட் அட்டென்பரோவுக்கு அஞ்சலி


220px-RichardAttenborough07TIFF

ரிச்சர்ட் அட்டென்பரோவுக்கு அஞ்சலி

காந்தியடிகளின் வாழ்க்கையை அடிப்படையாகக் கொண்டு தயாரிக்கப் பட்ட ‘காந்தி’ திரைப்படத்தை ஒட்டியே நாம் அட்டென்பரோவை அறிவோம். 20 ஆண்டுகள் உழைத்து நேரு, மவுண்ட்பேட்டன் உட்பட பல தலைவர்களை சந்தித்து, திரைக்கதையை உருவாக்கினார் அட்டன்பரோ. இந்திய இயக்குனர் யாராவது இந்த அளவு ஒரு படத்தை எடுத்திருக்க முடியுமா என்பது கேள்விக்குறி. அறுபது ஆண்டுகளுக்கும் மேல் நடிகர், இயக்குனர், தயாரிப்பாளர் என்னும் வெவ்வேறு துறைகளில் பணியாற்றிய ரிச்சர்ட் அட்டென்பரோ 25.8.2014 அன்று உயிர் நீத்தார். பத்துக்கும் மேற்பட்ட திரைப்படங்களை இயக்கிய அவரின் வாழ்நாள் சாதனை காந்தி திரைப்படம் தான்.

அந்தப் படம் வெளிவந்த போது எனக்கு மிகவும் இள வயது. அந்தப் படத்தின் பல அம்சங்களை என்னால் அப்போது இனங்கண்டு ரசிக்க முடிந்தது. அவரது சொந்த வாழ்க்கை மற்றும் பொது வாழ்க்கையின் எல்லா முக்கிய நிகழ்ச்சிகளையும் உள்ளடிக்கிய ஒரு திரைக்கதையை வடிவமைத்தற்காகவே அவரைப் பாராட்ட வேண்டும். ஒரு பத்திரிக்கை நிருபர் காந்தியைத் தொடர்ந்து செல்லும் போது அவர் காந்தியிடம் பேட்டி எடுத்து அவரைப் பற்றி எழுதுகிறார். இதில் தெற்கு ஆப்பிரிக்காவில் வழக்கறிஞராக காந்தி இருந்த காலம் தொடங்கி காந்தியடிகளின் ஐம்பது வருட வாழ்க்கை அவர் கொலையாவது வரை கதையாக வடிவமைக்கப் பட்டிருக்கிறது.

ஒரு திரைப்படம் என்னும் ஊடகத்தின் மிகப் பெரிய பலம் அது காட்சி மற்றும் உரையாடல் வடிவில் ஒரு பார்வையாளனின் மீது விரைவாய் ஆனால் ஆழமான ஒரு தாக்கத்தை ஏற்படுத்தும். அதன் மிகப் பெரிய பலவீனம் ஒருவரின் சிந்தனையை ஒரு நாவலில் வருவது போல முழுமையாக வெளிப்படுத்த முடியாது.

ஒரு திரைப்படத்தின் வெற்றி தனது பலத்தை வைத்து பலவீனம் போடும் தடைகளைத் தாண்டுவதிலேயே இருக்கிறது.

காந்தி திரைப்படத்தில் ஒரு காட்சியில் கழிப்பறையைக் கழுவதற்கு கஸ்தூரிபா காந்தி எதிர்ப்புத் தெரிவிக்கும் போது ஒரு கணவன் என்னும் அதிகாரத்துடன் காந்தி அதை நிலை நாட்டுவார். ஒரு நதியில் அவர் குளிக்கும் போது ஒரு ஏழைப் பெண்ணின் கிழிந்த ஆடையைக் கண்டு தமது மேலங்கியை அளிப்பார். இந்தியா பாகிஸ்தான் பிரிவினையை எதிர்க்கும் போதும், மதக்கலவரத்தை நிறுத்த உண்ணாவிரதம் இருக்கும் போதும் அவருடைய பேச்சு அல்லது வசனம் நீண்டது அல்ல. ஆனால் பொருள் பொதிந்தது. உப்பு சத்தியாகிரகத்தில் அவரின் தலைமை குணங்களும் போர்க்குணமும் மிக அழகாக வெளிப்படுத்தப் பட்டது. ஜாலியன் வாலா பாக் படுகொலையைக் காட்சிப் படுத்தியிருந்த விதம் கல்லையும் கண்ணீர் சிந்த வைத்து விடும். பின்னாளில் நான் பொற்கோயிலுக்கும் ஜாலியன்வாலா பாகுக்கும் போய் அந்த சிதிலமடைந்த சுவர்களில் உள்ள துப்பாக்கி குண்டுகளையும் துளைகளையும் கண்டு கண்ணீர் சிந்தினேன்.

இந்தியத் துணைக்கண்டத்தைப் பின்புலமாகக் கொண்டு படம் எடுப்பது ஒரு ஆங்கிலேயருக்கு எளிதானது அல்ல. இந்தியாவில் உள்ள பல்வேறு மத நம்பிக்கைகள், வழிபாட்டு முறைகள் இவற்றை உள்வாங்கி அவர் மேற்செல்ல வேண்டியிருந்தது. மிகவும் அழகாக அதை அவர் செய்திருந்தார். கஸ்தூரிபா காந்தி இந்திய குடும்ப வாழ்க்கை மற்றும் திருமணம் தொடர்பான சடங்குகள் பற்றி விவரிக்கும் பகுதி முக்கியமானது.

பல ஆண்டுகள் கழித்து இதை நினைவில் இருந்து எழுதுகிறேன். படத்தின் இந்தியத் தன்மை இறுதி வரை அவரால் பேணப் பட்டது. காந்தியின் இறுதி ஊர்வலத்தைக் காட்டும் போது “வைஷ்ணவ ஜனதோ” என்னும் பாடல் பின்னணியில் ஒலிக்கும்.

மனித இனம் உள்ள வரை காந்தியடிகளைப் புரிந்து கொள்ளவும் அவரது வாழ்க்கையில் இருந்து புதிய படிப்பினைகளைப் பெற்றுக் கொள்ளவும் முயற்சியும் ஊக்கமும் இருக்கும். அடுத்த தலைமுறைக்கு 80களில் காந்திஜியை காந்தி படம் எடுத்துச் சென்றது.

அட்டன்பரோ திரைப்படம் என்னும் ஊடகத்துக்குப் பெருமை சேர்த்தவர். அவருக்கு நம் அஞ்சலி.

(image courtesy:wiki)

Posted in நாட் குறிப்பு | Tagged , | Leave a comment

ஆயிஷா நடராசனுக்கு பால சாகித்ய அகாதமி விருது


index_051
ஆயிஷா நடராசனுக்கு பால சாகித்ய அகாதமி விருது

1999ம் ஆண்டு தான் ஒரு முறை கடலூரில் வைத்து இரா.நடராசனை சந்தித்தேன். எஸ்ஸார்சி எனக்கும் அவருக்கும் பொது நண்பர். ஆயிஷாவை நான் படித்து முடித்திருந்ததால் அவரிடம் அது குறித்துப் பேசினேன். வாழ்த்தினேன்.

ஆயிஷா ஒரு குறுநாவல் ஒரு பெண் குழந்தை. பதின் களில் உள்ள குழந்தை. கிராமப்புறப் பள்ளியில் விஞ்ஞானத்தில் மிகவும் ஈடுபாடு ஏற்பட்டு தனது ஆசிரியகளிடம் பல கேள்விகளைக் கேட்கிறாள். அவள் உற்சாகப் படுத்தப் படவில்லை. தன்னால் முடிந்த அளவு சிற்சில பரிசோதனைகளைச் செய்கிறாள். அவளில் நுட்பமான அறிவும் உற்சாகமும் குடும்பத்தினரால் புரிந்து கொள்ளப் படவில்லை. ஆசிரியர்கள் அங்கீகரித்துப் பாராட்டாத சூழல். மிகவும் ஆபத்தான ஒரு ரசாயனத்தை உட்கொண்டு பரிசோதிக்கும் போது இறந்து விடுகிறாள். 15 ஆண்டுகளுக்கு முன் படித்தது. நினைவில் இருந்து எழுதுகிறேன். இந்த நாவலின் மிகப் பெரிய பலம். கதை சொல்லிக்கு ரசாயனப் பரிசோதனைகள் குறித்து இருந்த அறிவும் ஒரு ஆசிரியராக, கிராமப்புற மாணவர்கள் மீது இருந்த பரிவும்.

அவ்வளவு ஆழ்ந்த வாசிப்பு அமையாமற் போன நிலையில் அப்போது நான் இருந்தேன். ஆயிஷா நாவலில் சற்றே மிகை எனக்குப் பட்டது. வணிகப் பத்திரிக்கைகளாலும் பாராட்டப் பட்ட குறுநாவல் அது. பரிதாபத்துக்காக ஒரு கதாபாத்திரத்தை சாகடிக்கும் உத்தி அதில் இருப்பதாகவே நான் கருதினேன்.

ஒரு மேல்நிலைப்பள்ளியின் முதல்வராகவும் எழுத்தாளராகவும் சமூக ஆர்வலராகவும் பன்முகமாகப் பணியாற்றிய நடராசனின் குழந்தைகளுக்கான கதைகளை நான் வாசித்ததில்லை. வளரும் தலைமுறை மீது அவருக்கு உள்ள அக்கறை மிகவும் பாராட்டத் தக்கது. கடந்த பத்தாண்டுகளில் பல குழந்தை நூல்களை அவர் எழுதி இன்று பாலசாகித்ய அகாதமி விருதையும் பெற்றுள்ளார்.

நான் பழகிய ஒருவர் விருது பெறுவது இதுவே முதல் முறை. (சுப்ரபாரதி நான் பழகும் முன்பே சில விருதுகளைப் பெற்றவர்.)

சமுதாயம் உருப்படும் எண்ணம் உள்ள யாரும் வளரும் தலைமுறையையே அவர்களின் நலன் மற்றும் பன்முக வளர்ச்சியையே இலக்காகக் கொள்ள வேண்டும். அத்தகைய இலக்குள்ளவர் இரா. நடராசன். வாழ்த்துகள்.

Posted in நாட் குறிப்பு | Tagged , | Leave a comment

கேரளாவின் பகுதி மதுவிலக்கு


200px-Glass_of_whisky

கேரளாவின் பகுதி மதுவிலக்கு

இன்னும் பத்து வருடத்தில் வெளிநாட்டு மது அல்லது உள்நாட்டிலேயே தயாரிக்கப் பட்ட செயாற்கை மதுவைப் படிப்படியாக நிறுத்தி கள் மட்டும் அருந்தலாம் என்னும் சூழலைக் கொண்டு வருவதாகக் கேரள அரசு முடிவு செய்துள்ளது.

இது பகுதி மது விலக்கே. ஆனால் நல்ல விஷயம் கள் அருந்துவோருக்கு செலவு குறைவு. ஏழைக் குடும்பங்களின் ஆண் தனது வருமானம் முழுவதையுமே குடியில் செலவிடுகிறான் இல்லையா? அதிலிருந்து செலவு குறைவான குடிக்கு அவன் மாறக் கூடும்.

எப்படி இருந்தாலும் இது வரவேற்கப் பட வேண்டிய ஒன்றே. இன்று நாட்டில் குடிக்காதவர் ‘மைனாரிட்டி’. இதில் குழப்பமே இல்லை. நான் குடிப்பதில்லை என்றால் புருவத்தை உயர்த்தும் பலரை நான் பார்த்திருக்கிறேன். நாடு முழுவதும் அவசரமாக ஒரு ‘சர்வே’ எடுக்க வேண்டும். பள்ளி மாணவர்களில் குடிப்பழக்கம் உள்ளவர்கள் எத்தனை சதவீதம்? கல்லூரி மாணவரில் இன்னும் குடிப்பழக்கம் இல்லாதவர்கள் எத்தனை சதவீதம்?

தமிழ் நாட்டில் 60 70களில் கள், சாராயம் விற்கும் கடைகள், ஒயின் வகைகளில் வரும் உள்நாட்டு வெளிநாட்டுத் தயாரிப்புகளை விற்கும் கடைகள் இரண்டுமே இருந்தன. எந்த வருடம் முதல் எந்த வருடம் வரை என்பது சரியாக நினைவில் இல்லை. கள்ள சாராயம் என்னும் ரசாயனக் கலவையை அருந்தி நிறைய பேர் உயிரிழக்கவே பாட்டில் வகை மது மட்டுமே அனுமதிக்கப் படும் என்னும் கட்டாயம் தமிழ் நாடு மற்றும் பல மாநிலங்களில் அமலுக்கு வந்தது. இவற்றில் விலை அதிகம் என்பதால் வரி வசூல் வருவாய் அதிகம். பின்னர் அரசு வருமானத்தை உத்தேசித்து இதை அரசே வாங்கி விற்கும் பழக்கமும் வந்தது.

இன்று புலிவாலைப் பிடித்த கதைதான். அரசுக்கு மருத்துவச் செலவு , உழைக்கும் ஆண்களின் உழைப்பு நேரம் இழப்பு, ஏழைப் பெண்கள், குழந்தைகளின் கல்வி, சுகாதாரம், எதிர்காலம் பெரிய கேள்விக்குறியானது இவை ஒரு பக்கம். கணிசமான வருவாய் மறுபக்கம். பாலியல் வன்முறைக்கு மது ஒரு முக்கிய காரணம் என்பது கவனத்தில் கொள்ளப் பட வேண்டும்.

அரசியல் கட்சிகள் கூட இப்போது பூரண மதுவிலக்கு என்று பேச ஆரம்பித்து விட்டார்கள். முன்பு சமூக ஆர்வலர்கள் மட்டுமே எழுப்பிய கோரிக்கை இது.

வளர்ச்சிக்குத் தேவையான வருமானமும் வேண்டும், மதுவிலக்கும் வேண்டும். தற்காலிகமாகவோ நிரந்தரமாகவோ அரசுக்கு ஏற்படும் வருவாய் இழப்பை கோடீஸ்வரர்களும் பெரிய நிறுவனங்களும் கண்டிப்பாக ஈடுகட்ட வேண்டும்.

கேரளா வழியில் பிற மாநிலங்கள் படிப்படியாக மது விற்பனையைக் குறைக்கும் பட்சத்தில் முதலில் கடைகள் மாவட்டம் முழுவதற்கும் ஒன்றே ஒன்று என்று ஏற்படுத்த வேண்டும். அங்கேயே அருந்தலாம். வாங்கிச் செல்ல முடியாது. வாடகை வண்டிகளில் மட்டுமே வர வேண்டும். சொந்த வண்டியில் வரக் கூடாது என்பதும் கட்டாயமாக்கப் பட வேண்டும்.

ஏழைக் குழந்தைகள் பெண்கள் இவர்களுக்கு சமூகம் செய்யும் மிகப்பெரிய உதவி இதை விட வேறில்லை.

(image courtesy: wiki)

Posted in நாட் குறிப்பு | Tagged | 1 Comment

யூ ஆர் அனந்தமூர்த்தி – அறிவின் கூர் முனையில் புனைந்தவர்


220px-U_R_Ananthamurthy_Z1

யூ ஆர் அனந்தமூர்த்தி – அறிவின் கூர் முனையில் புனைந்தவர்

ஆகஸ்ட் 22 2014 அன்று உயிர் நீத்த யூ ஆர் அனந்த மூர்த்தி கன்னட இலக்கிய உலகிலும் இந்திய இலக்கியத்திலும் மிகவும் புகழ் பெற்ற எழுத்தாளர். ஞானபீடப் பரிசால் கௌரவிக்கப் பட்டவர்.

சம்ஸ்காரா, அவஸ்தே, பாரதி புரா ஆகிய நாவல்கள் அவரது படைப்புகளில் புகழ் பெற்றவை. அவரது படைப்புகள் சாஸ்திரம், சம்பிரதாயம் சடங்குகள் என்று பேசி அவற்றில் ஆழ்ந்த நம்பிக்கையுடன் வாழ்ந்த தலைமுறையின் முரண்பாடுகளை, போலித்தனத்தை எள்ளுபவையாகவே இருந்தன. 80 வருடம் வாழ்ந்த அவரின் தலைமுறையில் அவர் மிகவுமே சர்ச்சைக்குரியவராகவே இருந்தார். இந்தியாவில் பட்டப் படிப்பும் இலக்கியத்தில் இங்கிலாந்தில் முனைவர் பட்டமும் பெற்று அவர் இந்தியாவில் கல்வித்துறையில் நீண்ட காலம் உயர்பதவிகளை வகித்தார்.

இந்திய மரபு அல்லது தொன்மையை இரண்டு விதமாக முரண்பட்டுக் காணும் அறிவு ஜீவிகள் உண்டு. மேல்ஜாதிக்காரர்களது நம்பிக்கை மற்றும் வழிபாட்டு முறைகள் மூடநம்பிக்கை உள்ளவை, பழங்குடியினர் மற்றும் சிறுபான்மையினரது நம்பிக்கைகள் பண்பாட்டின் குறியீடுகள் என்று. இந்த நிலைப்பாட்டையே அரசியல்வாதிகள் எடுத்தால் அது மதச்சார்பற்ற கொள்கையாகக் கொண்டாடப் படும்.

இந்த இருமையான அணுகுமுறையை அறிவுஜீவிகள் கொண்டிருப்பதற்கு ஒரே காரணம் படித்தவர்கள் மத்தியில் புத்திஜீவிகளாகவும், சிறுபான்மையினர் மற்றும் தாழ்த்தப் பட்டோர் மத்தியில் சமூக நீதி உணர்வு உள்ளவராகவும் ஒரு பிம்பத்தைக் கட்டமைப்பதே.

யூ ஆர் அனந்த மூர்த்தி அவர்களில் ஒருவர்தான்.

இந்தியச் சூழலில் ஒருவர் வலதுசாரி அல்லது இடதுசாரியாக அறியப்பட்டே தீர வேண்டும். தன் சுதந்திர சிந்தனையைப் பல்வேறு பரிமாணங்களில் வெளிப்படுத்த ஒருவருக்கு அனுமதியில்லை. தனது வயது மற்றும் அனுபவத்தில் இடதுசாரிகளை விமர்சிப்பவராகப் பரிணமித்து அதே சமயம் வர்க்கப் போராட்டத்தில் தொழிலாளி மற்றும் ஏழைகள் பக்கம் நிற்பவராகவும் ஒருவர் இருக்க முடியாது. ஒன்று வலதுசாரி அல்லது இடதுசாரி.

மறுபடி அறிவுஜீவிகள் பக்கம் வருவோம். இந்து மதம் (அல்லது பண்பாட்டை) விமர்சித்த அளவு பிற மதங்களை ஏன் விமர்சிப்பதில்லை என்னும் கேள்வியில் அவர்கள் அசடு வழியும் போலிகள் தான்.

இருந்தாலும் அவர்களை இந்துப் பண்பாட்டின் ஒரு பிரிவாகத் தான் காண வேண்டும். நாத்திகனுக்கும் இந்துப் பண்பாட்டில் இடம் உண்டு. இரு நிலைப்பாடு எடுக்கும் அறிவுஜீவிகளுக்கும் தான்.

அதே சமயம் மத நம்பிக்கைகளின் அடிப்படையிலேயே பிழைப்பை நடத்தும் ஒரு பெரிய பாரம்பரியம் மிகவும் வேரூன்றி இருப்பதை நாம் காண வேண்டும். இங்கே எழும் எதிர்ப்புக் குரல் கண்டிப்பாக (குறைந்த பட்சம் இந்தியத் துணைக்கண்டத்தில்) மதத்தின் பேரில் பிழைப்பு நடத்தும் எல்லா மதத்தினர் மீதும் பெரிய தாக்கத்தை ஏற்படுத்தும்.

இன்னும் எளிய வார்த்தைகளில் சொல்ல வேண்டுமானால் 10 திருடர்களில் 2 பேரை விட்டுவிட்டது உண்மைதான். 8 பேரையாவது தட்டிக் கேட்ட அளவு நாம் சந்தோஷப் பட வேண்டும்.

எழுத்தாளர்கள் அரசியலுக்கு வந்தது வெகு அபூர்வம். எழுத்தாளர்கள் சமூகத்தின் பல்வேறு பிரச்சனைகளில் களமிறங்குபவர்களாக இன்னும் எழவில்லை. அப்படி எழுந்த அனந்த மூர்த்தியின் அணுகுமுறையை நாம் புரிந்து கொள்வது இது ஒரு நல்ல துவக்கம் என்பதாலேயே.

எந்த மதமாக இருந்தாலும் எந்தக் கொள்கையாக இருந்தாலும் அதைப் பாதுகாக்கப் பாதுகாவலர் முன் வரும் போது அது தனது அறத்தின் பலத்தில் நிற்கும் வலுவில்லாத பிம்பமே ஏற்படும். எந்த மதத் தீவிரவாதியும் அந்த மதத்துக்கு செய்யும் மிகப்பெரிய காயம் இதுவே.

அனந்த மூர்த்தி சுதந்திர சிந்தனையை, கருத்துச் சுதந்திரத்தை அவற்றின் அடையாளமாக இருந்து வளர்த்தவர். மூர்க்கமான மரபுப் பிடிப்பை வாழ்நாள் முழுவதும் எதிர்த்தவர். இத்தகையோரே தனது பாரம்பரியத்தின் பலம் பலவீனம் பற்றிய சரியான புரிதல் உள்ள ஒரு ஆரோக்கியமான தலைமுறைக்கு வழி வகுக்கிறார்கள்.

அவரின் இந்தப் பணிக்காகவே அவர் என்றும் அவர் நினைவு கூரப்படுவார். அவர் மறைவுக்கு ஆழ்ந்த அஞ்சலி.

Posted in தனிக் கட்டுரை | Tagged | Leave a comment