கேகேகேயும் நானும் -10 (ஹெல்மெட்டும்)


images

கேகேகேயும் நானும் -10 (ஹெல்மெட்டும்)

என்னுடைய அறை அலமாரியின் மீது ஹெல்மெட் இடம்பிடித்தது கேகேகேவுக்கு கிண்டலாயிருந்தது.

“என்னப்பா ஞாயித்திக்கெழமை கூட நீ ஸ்கூட்டர்ல ஹெல்மெட் இல்லாம போவுறதப்பாத்தேனே.. இப்போ ஹெல்மெட்டைத் தேடி எடுத்து வெச்சிட்டியா?”

“தேடி எடுக்கவே ஞாயித்திக் கிழமைதானேப்பா டைம் கிடைக்குது.. ஆனா அன்னிக்கி மக்களைப் பாத்தா மூணு நாளுக்குள்ளே தேடி எடுப்பாங்க இல்லே வாங்கிடுகவாங்களான்னு ஆச்சரியமாத்தான் இருந்துது”

“ஜூலை ஒண்ணாம் தேதிக்கிப்பிறகு பாரு…”

“யாருமே டூவீலரே ஓட்ட மாட்டானோ….டிராபிக் ஃப்ரீயாயிடும்…”

“ஊர் ஃபுல்லா ஹெல்மெட் போட்டு ஓட்டப் போறாங்க…..”

“நீ டூவீலரே வெச்சுக்காத தெம்புல பேசறே கேகேகே”

“அப்பிடி இல்லப்ப்பா…. எதுக்கு உயிரையே பணயம் வைக்கணும்? டிராஃப்பிக் அவ்வளவு மோசமா இருக்கில்ல?”

“டிராஃப்பிக் பாதி நேரம் மனுஷனை வண்டியோட நிக்க வைக்குது. அப்போ தலையில் வேர்க்கிற வியர்வைக்குக் காத்து இல்லாம மறுபடியும் கழற்றி மாட்டிக்கணும்…
மழையிலே ஹெல்மெட் நனைஞ்சிட்டா…. அதப் போட்டவன் நேரா டாக்டர் கிட்டே போய் ஜுரத்துக்கு மருந்து வாங்கிக்கலாம்…”

“இதெல்லாம் சின்னத் தொல்லை தானேப்பா…?”

“பெரிய நன்மையெல்லாம் இருக்கு…”

“அது என்ன?”

“கடன்காரன் வண்டியோட நம்மை மடக்க முடியாது… அப்பா எதிரேயே கர்ல் பிரண்டோட போனாலும் தெரியாது.. ”

“லவர்ஸுக்கு ரொம்ப நல்லதுன்னு சொல்றியா?”

“அவுங்குளுக்கு ஒரு அசௌகரியமும் உண்டு… ”

“என்னப்பா அது…?”

“டக்குனு புரியாத அளவு உனக்கு வயசாயிப்போச்சு… வுடு”
(imagecourtesy:thewallpapers.org)

Posted in நகைச்சுவை | Tagged , | Leave a comment

ஆந்தை பூதம்- ஜெர்மானியக் கதை


download

ஆந்தை பூதம்- ஜெர்மானியக் கதை

சைதன்யா என்னும் குழந்தையின் எழுத்துத் திறன் பற்றி ஏற்கனவே நான் குறிப்பிட்டேன். திசை எட்டும் ஏப்ரல் ஜூன் 2015 இதழில் “திருமதி ஆந்தை” என்னும் குழந்தைகளுக்கான ஜெர்மானியக் கதையை மொழி பெயர்த்திருக்கிறார். ஜெகப்க்ரிம், வில்ஹெல்க்ரிம் என்னும் இரண்டு சகோதரர்கள் தாம் செவி வழிக் கேட்ட கதைகளைத் தொகுத்து Grimm’s Fairy Tales என்னும் நூலாக வெளியிட்டார்கள். அந்தக் கதைகளுள் ஒன்றே இது.

குளிர் மிகுந்த நாட்களில் விடிந்து வெகு நேரம் வரை சூரியன் தென்படாது. அப்படிப் பட்ட குளிர்கால இரவு ஒன்றில் ஒரு ஆந்தை எலிகளைத் தேடிச்சென்றது. தானியங்கள் வைக்கும் மரத்தால் ஆன களஞ்சியம் ஒன்றில் அது எலிகளைக் கண்டது. அவற்றைத் தின்றது. ஆனால் அது தின்று முடிப்பதற்குள் இரவு முடிந்து விடியும் நேரமே வந்து விட்டது. இன்னும் இருள் பிரியவில்லை. வெளிச்சம் வந்தால் தனது பயணத்துக்கு அது உகந்ததல்ல என்று ஆந்தை அந்தக் களஞ்சியத்திலேயே இரவைக் கழிக்க முடிவு செய்து, களஞ்சியத்தின் மேற்பகுதியில் இருந்த மரப்பலகை ஒன்றில் சென்று அமர்ந்தது. அதன் இரு கண்கள் மட்டும் வெளியில் இருந்து பார்ப்போருக்கு பயங்கரமாகப் பளபளப்பாகத் தெரிந்தன. முதலில் அந்தக் களஞ்சியத்தின் பணியாள் ஒருவர் வந்தார். அவர் ஆந்தையின் இரு கண்களையும் பார்த்து “ஒரு பூதம் பெரியகண்கள். மிகவும் பயமாயிருக்கிறது” என்று ஓடி விட்டார். பிறகு அவரின் முதலாளி, அக்கம்பக்கத்தவர் எனப் பின்வந்த எல்லோரும் பயப்பட நகர மேயர் அங்கே வந்தார். படைவீரர்களைப் போல எல்லோரையும் வரிசையாக நிற்கச் செய்தார். அவர்களுள் வீரனான ஒருவன் வந்து ஒரு ஏணி வைத்துக் களஞ்சியத்தின் மீது ஏறினான். அப்போது அந்த ஆந்தை சத்தமாகக் கூவியது. அதைக் கேட்டு பயந்து அவன் கீழே விழ மக்களும் பயத்தில் கத்தினார்கள். இந்த சத்தம் பிடிக்காத ஆந்தை சாளரம் வழியே பறந்து வெளியேறியது. மேயர் களஞ்சியத்தோடு பூதத்தைக் கொளுத்த முடிவு செய்து களஞ்சியத்தையே கொளுத்தி விட்டார்.

அச்சம் நம் பார்வையை, நம் புரிதலை, நம் தருக்கத் திறனை எந்த அளவு பாதிக்கும் என எடுத்துக்காடும் நல்ல கதை.

(image courtesy:kids.sandiegozoo.org)

Posted in சிறுவர் இலக்கியம் | Tagged , , | Leave a comment

புதிய சொல்


download

புதிய சொல்

சத்யானந்தன்

ஒரு மோசமான
தோல்வி
எதிர் நீச்சலிட எழும்
நூறு கரங்களை
ஓயச் செய்தது

ஒரு பிரம்மாண்ட வெற்றி
முளைவிடும்
நூறு
புதிய தடங்கள்
மண் மூடிப் போகச்
செய்தது

தற்செயலான
கரவொலிகள் கூட
அசலான கலைஞனின்
ஆன்மாவைக்
கட்டிப் போட்டது

கலையுலகும் இயங்குலகும்
செக்கைச் சுற்றிய
வட்டத்தில்
வெவ்வேறு புள்ளிகளில்

தினமும் ஒரு
புதிய பக்கத்தில்
ஒரு புதிய சொல்
கவிஞனுக்கே சாத்தியம்

(image courtesy:tumblr.com)

Posted in கவிதை, திண்ணை | Tagged | Leave a comment

கள்ளங்கபடமுள்ள குழந்தைகள் உலகம்


stock-vector-theater-icon-with-happy-and-sad-masks-vector-illustration-178147562

கள்ளங்கபடமுள்ள குழந்தைகள் உலகம்

குழந்தைகள் உலகம் கள்ளங்கபடமற்றதாக, அப்பாவித்தனமாக, வெளிப்படைத்தனம் கொண்டதாக இருக்க வேண்டுமா? இருக்க முடியுமா? இருக்கிறதா? இந்தக் கேள்விகள் நாம் எதிர்கொள்ளாமலேயே கடந்து செல்பவை. நாம் லட்சிய வடிவமான ஒரு அப்பா, அம்மா, சகோதரன் , சகோதரி, கணவன், மனைவி என்று நம்மிடம் பிம்பங்களின் பட்டியல் ஒன்றே இருக்கிறது. இந்தப் பட்டியல் வெளி உலகத்துக்குப் பொருந்தக் கூடும். ஆனால் ஒரு குடும்பத்துக்குள் இந்த அணுகுமுறை மூச்சுமுட்டும் சில சதுரங்களை உருவாக்கி விடுகிறது. ஒவ்வொருவருக்கும் தனக்கென ஒரு தொல்லையில்லா இடம் கிடைப்பதில்லை. லட்சிய அம்மா அப்பா சகோதரன் சகோதரி என்னும் பிம்பங்களின் அடிப்படையில் எதிர்பார்ப்புகளை சுமத்தி விடுகிறது மொத்தக் குடும்பம் அல்லது அதன் ஒரு அங்கத்தினர். மூச்சுமுட்டாத அளவு இடம் கொடுக்க எந்தக் குடும்பத்துக்கும் முன்னுதாரணங்கள் அல்லது பாரம்பரியம் இல்லை. அதனால் இப்போதும் இல்லை. இது அனேகமாக படித்த வசதியான குடும்பங்களில் கூட இருப்பதில்லை. இதனால் எழும் உறவுச்சிக்கல்கள் மற்றும் உரசல்களை சமகால இலக்கியங்களில் சில தொடுபவை.

மறுபடியும் குழந்தைகள் உலகத்துக்கு வருவோம். குழந்தைகளைப் பெரியவர்கள் பாதிக்கிறார்கள் என்பது சொல்ல வேண்டிய அவசியமே இல்லாத ஒன்று. எந்த அளவு பாதிக்கிறார்கள்? அதன் விளைவுகள் என்ன? குழந்தைகள் உலகம் வன்முறை மிகுந்தது தானா?

இந்தக் கேள்வியை மையமாக்கிய சிறுகதை காலச்சுவடு ஜூன் இதழில் கே.என்.செந்திலின் இரண்டாமிடம். பத்து வயதை நெருங்கும் ஒரு பெண் குழந்தைக்குத் தம்பிப்பாப்பா பிறக்கிறது. அவனுக்குக் கிடைக்கும் கவனம் அவளுக்குள் பொறாமையைக் கொழுந்து விட்டு எரியச் செய்கிறது. அவள் அவனைப் பனியில் கொண்டு போய்க்காட்டி குளிர் ஜூரத்துக்கு ஆளாக்குகிறாள். பின்னர் அம்மா தன்னிடம் மருந்து கொடுக்கச் சொன்னால் அவள் கொடுக்காமல் விட்டு விடுகிறாள். அவன் இறந்தால் நல்லது என்று சாமியிடம் வேண்டிக் கொள்கிறாள். அப்பா அம்மாவின் சோகம் அவள் மனதை மாற்றிக் கடவுளிடம் அவன் பிழைக்க வேண்டுமென்று வேண்டிக்கொள்கிறாள். அவன் பிழைத்துக் கொள்கிறான்.

வித்தியாசமான நாம் அனேகமாக கண்களை மூடிக்கொள்ளும் ஒரு முக்கியமான மனப்பாங்குச் சிக்கலை மையமாக்கிய கதை.

Posted in விமர்சனம் | Tagged | Leave a comment

2+2=5 குறும்படம்


download

குறும்படம் பற்றிய கட்டுரையை நான் ஜூன் 2015 காலச்சுவடில் வாசித்து அந்தப் படத்தையும் பார்த்தேன். ஈரானிய இயக்குனர் பாபக் அன்வரியின் இந்தப் படத்தை முதலில் பாருங்கள்.

படத்துக்கான இணைப்பு.

சாளை பஷீர் தந்துள்ள படக்கதையின் சுருக்கம் இது:
பதினைந்து மாணவர்களைக்கொண்ட வகுப்பறையானது அளவளாவல்களுடன் உற்சாகக் குமிழியிட்டுக் கொண்டிருக்கின்றது. படீரெனத் திறக்கும் வகுப்பறைக் கதவின் ஓசையும் இறுகிய முகத்துடன் நுழையும் ஆசிரியரின் வரவும் மாணவர்களின் அளவளா வலைத் திடுதிப்பென முடிவிற்குக் கொண்டு வருகின்றது. வகுப்பறையில் வலிந்து திணிக்கப்பட்ட அமைதியின் இறுக்கமானது படத்தின் கருவிற்கு முன்னுரை கூறுகின்றது.

மொத்தப் பள்ளிக்கூடத்திலும் அன்று ஏற்பட்டுள்ள மாற்றங்களை மாணவர்கள் கடைப்பிடித்து தொடர்ந்து ஒத்துழைக்க வேண்டும் என வகுப்பு தொடங்குவதற்கு முன்னர் தலைமையாசிரியர் வேண்டுகோள் விடுக்கின்றார். 2+2=5 என கரும்பலகையில் எழுதுகின்றார் ஆசிரியர். மாணவர்களைத் திரும்பத் திரும்ப சொல்ல வைக்கின்றார். இரண்டு மாணவர்கள் அதை மறுக்கின்றனர். “இதை மறுக்கும் உரிமையை உனக்கு யார் தந்தது ? நீ உட்கார்”எனஅவர்களை அடக்கும் ஆசிரியர் வெளியில் சென்று மூத்த மாணவர்கள் மூன்று பேரை அழைத்து வருகின்றார்.

கையில் சிறப்பு காவல்படைக்கான பட்டியை அணிந்திருக்கும் அந்த மூத்த மாணவர்கள் தங்களின் வெறும் கைகளைத் துப்பாக்கியைப்போலப் பாவித்து மறுக்கும் மாணவனை நோக்கிக் குறி பார்க்கின்றனர்.

இந்த மிரட்டலின் பின்னணியில் அந்த மாணவனைக் கரும்பலகையில் புதிய பாடத்தை எழுதச் சொல்கின்றார் ஆசிரியர். அவனோ 2+2=4 என எழுது கின்றான். உடனே அந்த மாணவன் சுட்டுத்தள்ளப்படுகின்றான். குருதித்துளிகள் கரும்பலகையில் உள்ள எழுத்தின் மீது தெறிக்கின்றது. மாணவனின் எழுத்தையும் அதன் மீது படிந்திருந்த அவனது குருதியையும் ஆசிரியர் கரும்பலகையிலிருந்து எந்தச் சலனமுமின்றி அழிக்கின்றார். 2+2=5 என திரும்ப எழுதுகின்றார். மாணவர்களை மீண்டும் மீண்டும் உரக்கச் சொல்ல வைப்பதோடு இந்தப் பாடத்தைக் குறிப்பேடுகளில் எழுதவும் சொல்கின்றார். 2+2=5 என தனது குறிப்பேட்டில் எழுதும் மாணவனின் விரல்கள் 5ஐ அடித்து விட்டு, 4 என எழுதுவதுடன் படம் நிறைவடைகின்றது.

படத்தின் செய்தியாக அவர் காண்பது என்ன? அது கீழ்க்கண்டவாறு:
அதிகார வலைப்பின்னலையும் வன்முறையையும் பயன்படுத்திப் பரப்பப்படும் பொய்யின் முன்னர் முணுமுணுப்பற்ற கீழ்ப்படிதலைக்கோரும் வெறுப்புக் கொள்கையின் அதிகாரப் பசிக்கு சமூகத்தின் ஒட்டு மொத்த மனசாட்சியும் தாழ்ந்து மண்டியிட்டு விடுவதில்லை. பொய்யும் வெறுப்பும் எத்தனை வலிமையுடையதாகத் தங்களைத் தாங்களே சித்தரித்துக் கொண்டு உலகம் முழுக்க ஊர்வலம் வந்தாலும் அவற்றை எதிர்கொள்ள உண்மையின் பிஞ்சு வடிவம் மட்டுமே போதும் என மானுடத்திற்கு நம்பிக்கை யூட்டி நிறைகின்றது இந்தக் குறும்படம்.
அவர் ஏன் இப்படி சுற்றி வளைத்துக் கூறுகிறார் என்பது எனக்குப் புரியவில்லை. உண்மையில் இந்தப் படம் நமக்கு சூசகமாகத் தரும் செய்தி இன்று இஸ்லாமிய பயங்கரவாதம் இஸ்லாமின் சாராம்சமாக முன்வைக்கும் வன்முறை இஸ்லாமின் திரிக்கப் பட்ட விளக்கம். அதன் மீது சுமத்தப்பட்ட பொய். அது துப்பாக்கி முனையில் ஏற்கச்செய்யப் படுகிறது. அதற்குத் துணை போகும் நிறுவனங்கள் உண்டு. ஆனால் மலாலா போன்று இதற்கு ;எதிர்க்குரல் கொடுப்போர் புதிய வரலாற்றை எழுதப் போகிறார்கள்.

படத்தின் முக்கியான அம்சம் இது சார்லி சாப்ளின் படம் போன்று வசனங்கள் வரிவடிவில் திரையில் வரும் ஊமைப்படம். இந்தப் படம் இலக்கு வைக்கும் தாக்கத்துக்காக இந்த வடிவம். ஆசிரியர் மற்றும் பள்ளி இவை பயங்கரவாதத்துக்குத் துணை போகாவிட்டால் இந்தப் படத்தில் தன் உயிரையே தரும் ஒரு மாணவன் போல அழிந்து தான் போக வேண்டும். ஆனால் நம்பிக்கை நட்சத்திரங்கள் இதை நிராகரிக்கும் முடிவுடன் பொறுமை காக்கும் இளைய தலைமுறை.

(image courtesy:youtube)

Posted in சினிமா விமர்சனம். | Tagged , , , , | Leave a comment

இந்திய ஆசிரியர்களுக்கான இணையதளம்


logo

இந்திய ஆசிரியர்களுக்கான இணையதளம்

ஆசிரியர்கள் குறிப்பாக அரசுப்பள்ளி ஆசிரியர்கள் விமர்சனத்துக்கு ஆளாகிறார்களே ஒழிய அவர்களுக்கு அண்மையான எந்த ஒரு அமைப்பும் இல்லை. அவர்கள் தம் தரத்தை உயர்த்திக் கொள்ள விரும்பினாலும் தமது பணியில் இன்னும் சிறப்பாகச் செயற்பட என்ன செய்யலாம் என்று யோசித்தாலும் பகிர விவாதிக்க ஒரு ஊடகம் இல்லை. இந்தக் குறையை நீக்குகிறது http://www.teachersofindia.org/(ஆங்கிலத்தில்). http://www.teachersofindia.org/ta/ (தமிழில்).

தமிழ் இணையதளத்தில் வகுப்பறை வளங்கள் என்னும் பகுதி என்னைக் கவர்ந்தது. வகுப்பறையில் நாம் காணொளி வழி கற்பிக்க வல்லவை, எளியதாய் காகிதத் துண்டுகளை வைத்து கோணமானி செய்யும் முறை, செய்யுளை எளிதாகக் கற்பிப்பது எப்படி, கணிதம் எளிது என்று மாணவன் ஆர்வம் கொள்ள நடத்துவது எப்படி என்னும் கட்டுரைகள், காணொளிகள் நிறையவே இருக்கின்றன.

பிற பகுதிகளில் உள்ள ஆசிரியர்களுக்கான கட்டுரைகள், அவர்களுக்குள் நடக்கும் விவாதங்கள் பயனுள்ளவை. தங்களைப் பற்றி “ஆசிரியர்கள், ஆசிரியர் பயிற்சியாளர்கள், கல்விக்காக இந்தியாவில் பணியாற்றும் அனைவருக்கும் இந்த இணையம் ஒரு மின் தளமாகும். இந்த மின் தளம், தேசிய அறிவுக் கழகம் (National Knowledge Commission) மற்றும் அஸிம் பிரேம்ஜி பவுண்டேஷன் (AzimPremji Foundation) ஆகிய இரண்டின் கூட்டு முயற்சியாகும்” என்று குறிப்பிடுகிறார்கள் இந்த இணையத்தில்.

எஸ்.ராமகிருஷ்ணன் இணையதளத்தில் இருந்து இந்த இணையதளம் பற்றிய விவரம் எனக்குத் தெரிய வந்தது. நிச்சயம் ஆசிரியர்களுக்கு உற்சாகம் தரும் இந்தத் தளம். தம் மனதில் உள்ளதைப் பகிரும் ஒரு ஊடகமாகவும். இதனால் அரசுப் பள்ளி ஆசிரியம் மாணவர் நல்ல பயன் பெறுவர்.

Posted in நாட் குறிப்பு | Tagged , | Leave a comment

கேகேகேயும் நானும்- 9 (தோனியும்)


mahi23

‘ஏம்ப்பா…. தோனி மூணாவது ஒன் டேயில பங்களாதேஷ் பௌலிங்கை நல்லா ஃபேஸ் பண்ணி எல்லாரோட வாயையும் அடைச்சிட்டாரு பாத்தியா?”

“சரி கேகேகே… இந்த மேட்ச்லேயும் தோனி ஸ்கோர் பண்ணல்லே … இந்தியா தோத்துப்போயிருந்தா?”

“எல்லாரும் பின்னி எடுத்திருப்பாங்க இல்லே..?”

“தோனி என்னப்பா ரேஸ் குதிரையா… அவருமேலே பெட் கட்டியிருக்கோமா?”

“அப்பிடி இல்லே சத்யா… தோனி மேலே நாம வெச்சிருக்கிற நம்பிக்கையும் மதிப்பும் அன்பும் தான் காரணம்…”

“நேசிக்கிறதுங்கறதே நாம நேசிக்கிறவங்களுக்கு நெருக்கடி கொடுக்கறத்துக்குத்தான்…இல்லையா கேகேகே….”

‘தோனி தோக்கவே மாட்டாறு.. கூல்னெஸ்ஸை லூஸ் பண்ணமாட்டாறுங்கறதுதான் அவரோட இமேஜ்….’

“இமேஜ் தொல்லைதான் இல்லையா…?”

“ஏம்ப்பா நல்ல இமேஜை மெயிண்டென்ய்ன் பண்ணத்தானே வேணும்?”

“நாம் கொடுத்த இமேஜால அவருக்கு அடிப்படை உரிமையெல்லாம் பறி போயிடும்…”

‘அவருக்கு என்னப்பா சத்யா உரிமை பறி போவும்?”

” ஏம்ப்பா…கேகேகே… தோத்துப்போற உரிமை… எரிச்சலாவுற உரிமையெல்லாம் அவருக்குக் கிடையவே கிடையாதா?”

“ஏய் சத்யா… நீ என்னப்பா இந்தியன் … இண்டியன் கேப்டனுக்குத் தோத்துப்போவுற உரிமை உண்டுங்கறியே?”

“தோக்குற உரிமை இல்லேங்கறியா?”

“எப்படிப்பா உண்டு…. இந்தியா எப்பவுமே ஜெயிக்கணும்ப்பா….”

“கிரிக்கெட்ல மட்டும் இல்லியா…?”

“அப்புடி இல்லப்பா… கிரிக்கெட்டிலேயாவதுன்னு சொல்லு… நாம ஜெயிக்கிற வாய்ப்பு அதிகம் கிரிக்கெட்டிலதான்ப்பா…’

“நமக்கே அது ஒண்ணுதான்னா… பங்களாதேஷுக்கு வேறே நெறய இருக்காப்பா…?”

“நீ என்ன சொல்லவர்றே சத்யா… தெளிவாச்சொல்லு….”

“பங்களாதேஷ் கேப்டனுக்கு அவுங்க ஊருல தோத்துப்போற உரிமை கொடுத்திருக்காங்களா?”

“ஏம்ப்பா.. தோனி எங்கே அந்த சின்ன டீம் எங்கே?”

“இப்புடிச்சொல்லிச் சொல்லியே உசுப்பேத்துங்க….”

“தோனி வர்ல்ட் கப்பு ஜெயிச்சவரு…”

“அப்புடீன்னா அப்புறம் தோக்கவே கூடாதா?”

“நோ லுக்கிங் பேக்..ப்பா”

“சரி எல்லா கேம்லேயும் வெற்றி தோல்வி ரெண்டு உண்டு… கிரிக்கெட்ல டிரான்னு மூணாவதா ஒண்ணு உண்டு…. அந்த மூணுல ஒண்ணு இந்தியாவுக்கு ஒரு டர்ன்ல வரத்தான்ப்பா செய்யும்…..”

“நீ பேசறமாதிரி செஞ்சா…. நம்ம ப்ளேயர்ஸ் மோட்டிவேட் ஆவமாட்டாங்க… தோக்கற ஆப்ஷனை சூஸ் பண்ணிடுவாங்க…..’

“கரெக்டா தப்பாச் சொல்றே. இப்புடி ஓவரா ப்ரெஷர் போட்டுப் போட்டு அவங்களோட நார்மல் கேம் விளையாடாமத் தோக்கறாங்க….”

“சத்யா… உனக்கு நான் சொல்லுறது புரியலே…”

“எனக்கு நீ சொல்ற ஒண்ணே ஒண்ணு புரியலே… கேகேகே… ஆனா உங்க எல்லோருக்குமே விளையாட்டுங்கறது வெற்றி தோல்விங்கற ரெண்டு இருக்கறதே புரியலே… ஸ்போர்டிவ்வா இருக்குறதுன்னு ஒண்ணு இருக்குனே தெரியலே…”

“உன்னோட விதண்டா வாதம் பண்ண நான் தயாரில்லே… ” அவன் தப்பித்தான்.

“நீங்க தோனியப்பத்தித்தானே பேசிக்கிட்டிருந்தீங்க…. பாவம் அவரு…” என்று உள்ளே நுழைந்தாள் என் மனைவி.

‘ஏம்மா…?”

“அவருக்கு ஃபைன்லாம் போட்டாங்களாமே….”

“அதுனால என்ன?”

“இப்பத்தான் ரெண்டாவது குழந்தை பொறந்திருக்கு… செலவுக்கு என்ன பண்ணுவாரு..?”

(image courtesy:google.plus.com)

Posted in நகைச்சுவை | Tagged , , | Leave a comment

வசதி படைத்தோர் சார்பாகவே தந்திரமாகச் செயற்படும் கல்விமுறை- வசந்திதேவியின் கட்டுரை


download

வசதி படைத்தோர் சார்பாகவே தந்திரமாகச் செயற்படும் கல்விமுறை- வசந்திதேவியின் கட்டுரை

24.6.2015 தமிழ் ஹிந்துவில் கல்வியாளர் வசந்திதேவியின் “வித்தகத் தந்திரங்கள்” கட்டுரை வெளியாகியுள்ளது. அவர் முன்வைப்பது இதுவே:

1. கல்விமுறை நகர்ப்புற வசதிபடைத்த குழந்தைகள் கற்று, போட்டிகளில் தேர்வாகும்படி அமைந்திருக்கிறது.

2 முன்பு .60 , 70 கால கட்டத்தில் இப்படி இல்லவே இல்லை.

3.கடந்த 40 வருடங்களில் தான் இப்படி ஆகி விட்டது.

4. ஆதிக்க வர்க்கத்தின் சதி இல்லை இது

5.ஆதிக்க சக்தி சமுதாயத்தின் மீது செய்து விடும் தாக்கத்தின் விளைவே இது.

இப்படி தெளிவான கருத்துக்களை அவர் தந்த போதும் ஒரு சில விஷயங்களை அவர் தொடாமலேயே விடுவிட்டார் அவர். தடாலடியாகத் தொலைக்காட்சியில் சில அறிவுஜீவிகள் ஒரே கருத்தை திரும்பத் திரும்ப அழுத்தமாகக் கூறி விட்டு அமைந்து விடுவது போல இருக்கிறது இந்தக் கட்டுரை.

கல்வி

1.வேலைவாய்ப்புக்காக மட்டுமே பெற்றோரால் மாணவரால் அணுகப்படுகிறது
2.வணிகத்துக்கு கல்வி என்னும் பெரிய அளவில் பணம் புரளும் வணிகத்துக்கு இது வழி செய்து வருகிறது.
3. மத்திய மாநில அரசுகள் இருவருக்குமே பொதுவான துறை கல்வி. கல்வியில் அரசியல் போராட்டம் வணிகத்தின் பின் விளைவாக நடைபெறுகிறது.

இந்த முக்கியமான மூன்று விஷயங்களை அவரது கட்டுரை தொடவே இல்லை. அவரைப் போன்ற ஆகப் பெரிய ஆளுமையை விமர்சிக்க நீ யார்? கல்வித்துறை பற்றி உனக்கு என்ன தெரியும்? உருப்படியாக இரண்டுவரியாவது எழுதி இருப்பாயா? என்ற கேள்விகள் என் போன்ற சிறிய ஆளுமைகளை நோக்கி எழும். கல்வி பற்றி அக்கறையுடன், இன்றைய கல்விச் சூழல் பற்றி இரண்டு தொடர் கட்டுரைகளை நான் திண்ணை இணைய தளத்தில் எழுதினேன். அவற்றுக்கான இணைப்பு கீழே:

கல்விக் கனவுகள் – பணம் மட்டுந்தானா வில்லன்?- பகுதி 1

கல்விக் கனவுகள் – பணம் மட்டுந்தானா வில்லன்?- பகுதி 2

கல்விக் கனவுகள் – பணம் மட்டுந்தானா வில்லன்?- பகுதி 3

கல்வியில் அரசியல்-1

கல்வியில் அரசியல்-2

கல்வியில் அரசியல்-3

Posted in திண்ணை, நாட் குறிப்பு | Tagged , , , | Leave a comment

பச்சோந்தியின் குழப்பம்- எரிக் கார்லே கதை


ecshoulphoto

24.6.2015 தமிழ் ஹிந்துவில் எரிக் கார்லேயின் “குழம்பித்தவித்த பச்சோந்தி” என்னும் குழந்தைகளுக்கான சிறுகதை சுவாரசியமான வாசிப்பைத் தந்தது.

கதை எப்படி சுவையாகச் சொல்லப்பட்டிருக்கிறது? பச்சோந்தி தான் இலைகளோடு இருந்தால் பச்சை நிறமாகும், மரத்தின் அடியில் இருந்தால் மரத்தின் நிறமாகும். இப்படியாகப் பார்ப்பவர்களே குழம்பிப் போவார்கள் இல்லையா?

ஆனால் குழப்பும் பச்சோந்தி எப்படித் தானே குழம்பியது?

ஒரு நாள் அது மிருகக்காட்சிசாலைக்குப் போனது. பனிக்கரடியைப் பார்த்ததும் அது போல வெள்ளைத் தோலும் பெரிய உருவமும் இருந்தால் எவ்வளவு நன்றாக இருக்கும் என்று நினைத்தது. மறுகணம் அதற்கு அந்த அமைப்பில் உள்ள பச்சோந்தி உடல் கிடைத்தது. அடுத்து நரியின் வால், மீனின் துடுப்பு, மானின் கொம்பு, நாரையின் சிவப்பு இறக்கைகள், அதன் நீண்ட கால்கள் ஆமையின் ஓடு, யானையின் தும்பிக்கை என ஒரு பெரிய பட்டியலாகவே அதன் ஆசை நீண்டது.

பல விலங்குகளின் ஒரு உறுப்பு சேர்ந்து அது பெரிய விசித்திரமான விலங்காக மாறியது. பசி எடுத்த போது அது ஒரு பூச்சியைப் பிடிக்க நாக்கை நீட்ட நினைத்தால் முடியவில்லை. தும்பிக்கையைத் தாண்டி நாக்கை நீட்டுவது எப்படி அதற்குப் புரியவில்லை. எந்தெந்த உறுப்பை எப்படி அசைப்பது? அது குழம்பிப்  போனது. பசி அதிகரித்தது. மீண்டும் பழைய வடிவம் கிடைத்தால் எவ்வளவு நன்றாக இருக்கும் என்று நினைத்தது. உடனே பழைய உருவம் கிடைத்தது. அது பூச்சியைப் பிடித்துத் தின்றது.

எளிய கதை. உள்ளே அவரவருக்கு ஒரு தனித்தன்மையும் திறனுமுண்டு என்னும் கருத்து. போதனை செய்யும் முறையில் இல்லாத சரளமான கதை. எரிக் கார்லே அமெரிக்காவின் புகழ் பெற்ற ஓவியரும் சிறுவர் இலக்கியம் படைப்பவருமாவார்.

(image courtesy:eric-carle.com)

Posted in சிறுவர் இலக்கியம் | Tagged , | Leave a comment

குழந்தை எழுத்தாளர் மொழிபெயர்ப்பாளர் சைதன்யா


IMG_2680

குழந்தை எழுத்தாளர் மொழிபெயர்ப்பாளர் சைதன்யா

ஆறாம் வகுப்புப் படிக்கும் ஒரு மாணவி எஸ்.ராமகிருஷ்ணனின் சிறுவர்களுக்கான கதை நூலை ஆங்கிலத்தில் மொழிபெயர்த்திருக்கிறார். “ஒரு தங்க நாணயம்’ என்னும் ஆப்கானிஸ்தானக் கதையை தமிழில் “திசை எட்டும்” -ஏப்ரல்-ஜூன் 2015 இதழில் சைதன்யா தந்திருக்கிறார். சரளமான பிழையற்ற தமிழ். 2013க்கான திசை எட்டும் விருதைப் பெற்றிருக்கிறார்.

தங்க நாணயம் கதை பொறுப்பற்ற ஒரு இளைஞன் தன் தந்தையின் நிழலில் இருந்து விலகி வாழ்க்கையை எதிர் கொள்ளும் போது பொறுப்பானவனான மாறுவதைச் சித்தரிக்கும் கதை. ஒரு செல்வந்தரின் மகன். இளைஞனான பிறகும் அவன் தந்தைக்கு வியாபாரத்தில் உதவி எதுவும் செய்யவில்லை. வெட்டியாகப்பொழுது போக்கிய அவன் ஒரு நாள் குளத்தில் கூழாங்கற்களை எறிந்து விளையாடிக்கொண்டிருந்தவன் அவை தீர்ந்த உடன் தங்க நாணயங்களை எறிந்து விளையாடுகிறான். அதைக் கண்ட அவனது அப்பா கவலை மிகுந்து மிக நெருங்கிய நண்பருடன் ஆலோசிக்கிறார். அவரும் வணிகர் தான். தாம் இந்தியாவுக்கு வணிக விஷயமாகச் செல்வதாகவும் அவன் தன்னுடன் வந்து உலகைப் புரிந்து கொள்ளட்டும் என்கிறார். அப்பா அனுப்பி வைக்கிறார். அவருடன் காடு மேட்டில் அலையும் அந்த இளைஞன் அவர் ஒரு ஊருக்கு வெளியே கூடாரம் அமைத்துத் தங்கி இருப்பதைப் பார்க்கிறான். அப்போது அவனுக்குத் தனியே அந்த ஊருக்குள் போய் சுற்றிப்பார்க்க விரும்புகிறான். கிளம்பிப் போய் கையில் இருக்கும் காசை வாரி இரைத்து உணவு உண்டு இடங்களைச் சுற்றிப்பார்த்துவிட்டுத் திரும்பிக் கூடாரம் தேடினால் வழி தெரியவில்லை. இவன் பேசும் மொழி அந்த ஊர்க்காரர்களுக்குத் தெரியவில்லை. சைகை செய்தாலும் பயனில்லை. நான் கு நாட்கள் அலைந்து கூடாரம் இருக்கும் இடத்தைக் கண்டுபிடிக்கிறான். ஆனால் அங்கே கூடாரமே இல்லை. உடன் வந்தவர்களையும் காணவில்லை. பல ஊர்களில் தேடி அலைகிறான். முதலில் நாணயங்களை வைத்து வாழ்கிறான். பிறகு தன் விலையுயர்ந்த உடைகளை விற்றுச் செலவு செய்கிறான். அதுவும் தீர்ந்த பிறகுதான் அவனுக்குத் தான் வேலை செய்ய வேண்டும் என்று புரிகிறது. ஒரு நாள் முழுவதும் கட்டிட வேலை செய்தால் ஒரு வெள்ளி கூலி. அதில் அரை வெள்ளியை சேமிக்கிறான். இப்படியே ஒரு வருடத்தில் அவனுக்கு ஒரு தங்க நாணயத்துக்கு உண்டான வெள்ளிகள் சேரவே அவன் அதை வைத்து ஒரு தங்க நாணயம் வாங்கிப் பத்திரப்படுத்திக் கொள்கிறான். அவனைப் பின் தொடர்ந்த அப்பாவும் நண்பரும் அவனைச் சந்திக்கிறார்கள். அப்போது அவன் ஒரு குளக்கரையில் அமர்ந்திருக்கிறான். அப்பாவைப்பார்த்ததும் மகிழ்ந்து அவரிடம் தான் சம்பாதித்த நாணயத்தைக் காட்டுகிறான். அதைப் பிடுங்கி அவர் குளத்தில் எறியப் போகிறார். அப்போது “அப்பா. இது என் ஒரு வருட உழைப்பு. வீசி விடாதீர்கள்.” என்று கெஞ்சுகிறான். அவன் திருந்தியதை அறிந்து அவர் மகிழ்ந்து ஊருக்குக் கூட்டிச் சொல்கிறார். அவன் அவருடைய வியாபாரத்தில் துணையாயிருந்து பெரிய பொருள் ஈட்டித்தருகிறான்.

சைதன்யா தேர்ந்தெடுத்த கதையும் அவர் தமிழும் ரசனைக்குரியவை. வலைப்பூக்களில் அவர் தொடர்ந்து பதிவுகளும் செய்து வருகிறார். அவர் மற்றும் அவரது எழுத்து வளர வெல்ல வாழ்த்துக்கள். அவரது பெற்றோர் பாராட்டுக்குரியவர்கள்.

Posted in சிறுவர் இலக்கியம் | Tagged , | Leave a comment