காத்யாயனி


kathyayani

(ஜூன் 2016 இதழில் வெளியிட்ட குமுதம் ‘தீராநதி’ இதழுக்கு நன்றி)

காத்யாயனி

சத்யானந்தன்

மூன்றடுக்கு சயன வசதியில் வழக்கம் போல் நான் மேற்தட்டுப் படுக்கையை முன்பதிவு செய்திருந்தேன். அக்டோபர் மாதமானாலும் பெட்டிக்குள் வெப்பம் கணிசமாயிருந்தது. பயணப் பெட்டிகளை இருக்கைக்குக் கீழே இடம் பார்த்து வைக்கும் பரபரப்பு – சந்தடி, வழியனுப்ப வந்தோரின் உரத்த கரிசனம், இளசுகளின் விடுமுறை உற்சாகக் களிப்பு இவைகளின் தாக்கம் மேற்படுக்கையில் சற்று தணிந்தே வந்தடையும். கழுத்தில் வழியும் வியர்வையைத் துடைத்துக் கொண்டேன். பரிசோதகர் வரும் முன் தூக்கம் சொக்கி விடும்.

சென்னை சென்ட்ரல் போல நம்பள்ளி அருகே மின்சார ரயில் வசதி இல்லை. சுரேஷுக்கு ரவீந்திரனின் பயண விவரம் மிகவும் தாமதமாகவே தெரிய வந்தது. கச்சிபௌலியைக் கடந்ததே பெரிய போராட்டம். மேதிப் பட்டின நெரிசலில் மாட்டிக் கொண்டான். இருசக்கர வாகனம் ஆனதால் ரயில் கிளம்பும் முன் வந்து சேர இயன்றது.

முதலில் யாரோ என்னைத் தோளில் தொட்டு அசைக்கும் அதிர்வு, அதைத் தொடர்ந்து ‘ரவீந்திரன்’ என்னும் குரல் கேட்டது. டிக்கெட் பரிசோதகர் இல்லை அது. சுரேஷ். நானே முன் வந்து எதையும் பேச விரும்பவில்லை. எழுந்து உற்கார முயன்றேன். “பரவாயில்லை… படுங்க” தோளைத் தொட்டு அழுத்தினான். “முழிச்சிக்கிட்டே தூங்கற மாதிரி நடிக்கலையே?”

நீண்ட விசில்கள் அவன் கண்களை உற்றுப் பார்த்தபடி இருந்த என் மௌனத்தை முடித்து வைத்தன. “விஜயதசமிக்கு அடுத்த நாள் வருவீங்களா?” என் தலையசைப்பைப் பார்த்து நகர்ந்தானா பார்க்காமலேயா? நான் படுத்துக் கொண்டேன்.

நாள் 7 2015

“சாமி ஏம்மா குதுரை மேல உக்காந்திருக்கு?”

‘குதுரை இல்லடா அது. கழுதை. ஓ.. கழுதையே பாத்ததில்லியா?”

“ஏம்மா சிவனுக்குத்தானே மூணு கண்ணு இருக்கும்?” இது அவன் தங்கை.

“இது காலயாத்ரி. அருவாளு, அடுக்கு சூலமின்னு கோவமா இருக்கு அம்மன்”

மதுவுக்கு மறதியாக இரண்டு கோப்பைகளை எடுத்து வைத்த சுரேஷ் ஒரு கிண்ணத்தை மட்டும் எடுத்து மற்றொன்றை வெறித்தான். கிண்ணம் காலியானதும் சுவர் அலமாரியில் உடுப்புத் தட்டில் இருந்த பெரிய பிளாஸ்டிக் பையைத் துழாவினான். ரவீந்திரனின் மேல் சட்டை இல்லாத பெரிய புகைப்படம், ரவீந்திரனின் அந்தரங்க உள்ளாடை ஒன்று. துவைக்கப்படாததென்று கறை அடையாளங்கள் காட்டின. இரண்டையும் பிளாஸ்டிக் பையிலிருந்து உருவி வீசி எறிந்தான். கண்ணாடிக் கோப்பைகளை சமையலறைக் கழுவுத் தொட்டி மீது விட்டெறிந்தான். அவை நொறுங்கின. குளியலறையின் ‘ஷவர்’ ரில் வெகு நேரம் நனைந்து குளித்து வெளியே வந்தான். படுத்தவன் புரண்டு புரண்டு அரை மணியில் எழுந்தான். விளக்கைப் போட்டு கண்களால் துழாவி, சுவரோரமிருந்த ரவீந்திரனின் உள்ளாடையை முகர்ந்தான். பின்னர் அதை மேல் கீழாகத் திருப்பி முன்பக்கத்தின் மையப் பகுதியை சுருட்டி வாயினுள் இட்டான். சுவைத்தான். பின்னர் தன்னருகில் தலையணையின் மேல் வைத்துக் கண்ணயர்ந்தான்.

நாள் 8 – 2015

காலை மணி ஒன்பது. ‘க்ரீம்ஸ் ரோடு’ லலித் கலா அகாதமி அரங்கத்துக் காவலாளி என்னிடம் “எக்ஸிபிஷன் திறக்கறத்துக்கு இன்னும் ஒன் அவர் இருக்கு ஸார்” என்றான். நான் தங்கியிருக்கும் விடுதிக்குத் திரும்பினேன்.

காலை மணி பதினொன்று. அம்மனின் மூன்றாவது நான் காவது கரத்தைப் பொருத்தினாள் சுமதி. வலது கையில் சூலம் விரல்களுக்கு இடையே நுழைந்து கொண்டது. இடது பக்கத்தில் ஒரு கையில் தாமரைத் தண்டு கைவிரலிடுக்கில் பொருந்தியது. மறு கையில் உடுக்கை பொருந்தவில்லை. ஒரு ஓட்டை போட்டு, குச்சி வைத்துப் பொருத்த வேண்டும். மஹா கௌரி என்று ‘தெர்ம கோலி’ ல் வடிவமைத்த எழுத்துக்களை சிலையின் பின்னணியில் பொருத்தி வைத்தாள். ஓட்டை போட ஊசி தேடிப் பையைத் திறந்த போது அலைபேசியைப் பரிசோதித்தாள். ரவீந்திரனிடமிருந்து குறுஞ்செய்தி அழைப்பு எதுவுமே இல்லை.

1999- நாள் 1

“சுரேஷ்.. நீங்கள் கல்லூரி படிப்பை ராணுவத்தில் சேர்ந்து படிக்க விரும்பும் காரணம் என்ன?”

“இது என் அப்பாவின் முடிவு. அவரிடம் தான் நீங்கள் கேட்க வேண்டும்”

“இந்தக் கடவுள் படத்தை வைத்து உங்களால் எந்தக் கடவுள் என்று யூகிக்க முடியுமா?”

“அம்மன் படம். வேறு எதுவும் தெரியவில்லை. நந்தி மீது அமர்ந்திருக்கிறார்”

“பரவாயில்லை. இது நவராத்திரியில் ஷைலபுத்திரி என்னும் வடிவம். மலையரசனின் மகள் என்று பொருள். சரி. இந்தப் படத்தில் வேறு எதாவது புரிகிறதா?”

“ஒரு கையில் சூலம், மறு கையில் தாமரை. அதைத் தவிர என்ன புரிய வேண்டும்?”

“நன்றி. நேர்முகம் முடிந்தது”

நாள் 3 – நாள் 5 – வருடமில்லை

“அம்மா என்னை ஏன் மடியிலிருந்து இறக்கி விருகிறீர்கள்? ” சிங்கத்தின் மீதிருந்த தாயைத் தரையில் நின்றபடி ஆறுமுகண் கேட்டான்.

வலது கைகள் இரண்டிலிமிருந்த இரண்டு தாமரைகளுள் ஒன்று மறைந்தது. ருத்ராட்ச மாலை, வில், அம்பு, கமண்டலம், வாள், சூலம், கதை என மேலும் ஏழு சேர எட்டு கைகளில் இரண்டு கைகள் தனக்காகவோ என்றோ எதையும் ஏற்றிக் கொள்ளாமல் இருந்ததை ஆறுமுகன் அவதானித்தான்.

“இந்த வடிவில் நான் உங்கள் மடியில் இல்லையே தாயே?”

“எல்லா வடிவங்களிலும் நீ என்னுடன் இருக்க மாட்டாய் முருகா. ஐந்தாம் நாளில் மட்டுமே ஸ்கந்த மாதா நான். உனக்கு அதிகபட்சமாகப் பத்து கைகளுடன் நான் காட்சி தருகிறேன். கமண்டலம், ருத்ராட்சம், சூலம், தாமரை என முரணானவற்றை சுமக்கிறேன். முரணானவற்றை அவதானிக்க நேரும் போது பிடிபடும் கந்தா”

நாள் 4 – 2014

டிசம்பரில் ஹைதராபாத் போயிருந்த போது பசுமை பற்றிய நிகழ்ச்சி ஒருங்கிணைப்பில் ‘குஷ்முண்டா’ தேவி. பச்சைப் பின்புலத்தில் எட்டு கரங்களில் சக்கரம், தேன்குடம், கதை, ருத்ராட்ச மாலை, கமண்டலம், வில், அம்பு, தாமரை ஒவ்வொன்றுக்கும் நிகழ்ச்சியின் ஒவ்வொரு பகுதிக்கு இடையே விளக்கம் தந்து நடத்திச் சென்றாள். ரவீந்திரன் இரவு உணவின் போது “உருவ வழிபாட்டை உசத்தியாக் காட்டறதுல போய் முடியும் நீ கொடுத்த விளக்கம் எல்லாமே” என்றான்.

“வேட்டையே இல்லாம, இயற்கையை யூஸே பண்ணாம விட்டுடறதான் ‘கிரீன் இனிஷியேடிவ்’ ன்னு எல்லோரும் பேசப் போறாங்க. நான் குஷ்முண்டாவை அதுனாலத் தான் பொரெஜெக்ட் பண்ணினேன்”

அதன் பிறகு ஆழமான எந்த உரையாடுலும் இல்லை. இரவு அவளுடனேயே தங்கினான். இயல்பாகத் தான் தொடங்கினான். அவள் சுருதி மீட்டப்பட்டவளாக எதிர்பார்ப்புடன் சிலிர்த்திருந்த நேரத்தில் ஏன் திரும்பிக் கொண்டு படுத்து விட்டான்?

நாள் 2 – 2016

‘வெள்ளை ஆடையும், ஒரு கையில் ருத்ராட்ச மாலையும் கமண்டலமுமாய் நிற்கும் பிரம்மசாரிணி ஆணுக்கு இணையாகப் பெண்ணால் திருமணமின்றித் தனியாக வாழ முடியும் என யாரோ ஒருவருக்கு விளக்கிக் கூறிக் கொண்டிருந்தாய். தள்ளி இருந்து ரசித்தேன். நவராத்திரி சுமதி என்று பட்டப் பெயர் வராதபடி வெவ்வேறு சித்தரிப்புக்களைத் தந்திருந்தாய். ஆண் என்று பாறைகளே ஆன குன்றையும் பெண் என்று பசுமையான காட்டையும் ”கொல்லேஜ்’ வடிவில் சித்தரித்திருந்தாய். புன்சிரிப்பு வந்தது”

“இந்த முறை என்னை என்னை சந்திக்காமலேயே திரும்பி விடுவீர்களா?’ என்ற அவளது பதில் என்னை அசைத்தது.

நாள் 9 – 2015

‘சித்தி தாத்ரி’ யின் சக்கரம், கதை, தாமரை, சங்கு இவற்றை எளிதாகப் பெட்டிகளுக்கு அடுக்கி விட்டாள். அமர்ந்திருந்த பெரிய தாமரையை நான் ஒரு கை கொடுத்துத் தூக்கினேன். பெரிய பெட்டியில் இருவரும் இறக்கினோம். நாளை எல்லாவற்றையும் அலுவலகத்துக்கு அனுப்பி விடலாம் என்றாள்.

என் இடத்துக்கு அவள் வந்ததும் ‘அனிமேஷ’னில் கலை, பிழைப்பு இரண்டுக்குமே வழி இருக்கிறதா என்னும் சரட்டைத் துவங்கினாள். நவீனம் கலை இவை திட்டமிடுதல் அல்லது அதுவே உலகம் என்று பிரகடனப்படுத்தல் இரண்டு முனையையுமே நிராகரிக்கும் என்று தொடங்கி என்ன பேசினேன்? என்ன புரிந்து கொண்டாள்? அவள் மீது உரிமை எடுத்துக் கொண்டு நெருங்கி முயங்கி இறுதியில் கலவி, உடல் மனம் ஒருமையில் நிறைவடைந்த போது அவள் முகமெங்கும் நாணமும் நிறைவுமாய் மூடின அவள் கண்கள். அதனாலேயே என் முகத்தில் மிளிர்ந்த வெற்றிக் களிப்பை, ஆழ்ந்து, சென்ற வருடத்தில் விட்ட இடத்தில் இருந்து தொடரும் கோர்வையில் அவள் இல்லை.

நாள் -6 – 2016

காத்யாயனி சிங்கத்தை விட்டு இறங்கினாள். வலது கைகள் இரண்டில் வாளும் தாமரையும். தாமரையை இடது கைகள் இரண்டுள் ஒன்றில் மாற்றி, காலை உயர்த்தியும், இரு கால்களையும் உந்தி, பூமிக்கு மேலெழுந்து கீழே இறங்கித் தாண்டவமாடியும், கைகளைச் சுழற்றிச் சுழற்றி, கண்களை உருட்டி முன்னும் பின்னுமாய் ஆடினாள். கத்தியில் இருந்து புயற்காற்றடித்துத் தூசிகளை ஊரெங்கும் நிறைத்து எங்கும் இருண்டது. தாமரையிலிருந்து கனன்று எட்டுத்திக்கும் பெரு நெருப்பு நீண்டது அந்தக் கனலில் காத்யாயனியின் தாண்டவம் இன்னும் உக்கிர தரிசனமானது. தீயின் கங்குகள் அவளுக்கு எதிராட்டம் போல் மேலெழுந்து ஆடின. ஒற்றைப் பொறி ஒன்று பறந்து வடிவில் பெருகிப் பெருகி ஒரு சுடரானது. சுரேஷின் அறையில் அவன் கிழித்தெறிந்த ரவீந்திரனின் புகைப்படத்தை எரித்தது.

அந்த சாம்பலை மிதித்து மிதித்து அறையெங்கும் வீடெங்கும் அலைந்து திரிந்தான் சுரேஷ். மறுநாள் வீட்டைக் கழுவிக் காய வைத்தான்.

Advertisements

About தமிழ் எழுத்தாளர் சத்யானந்தன்

Sathyanandhan is a thinker and writer in Tamil for more than a decade. His works have been published in literary magazines like Knaiyazhi. In the web his recent works are in Thinnai.com. His distinction is his ability to creatively write in all genre i.e. Short story, poem, article, novel, criticism and articles on a variety of subjects. He is popular for his works on Ramayanam and Zen published in Thinnai during 2011.
This entry was posted in சிறுகதை and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s